WAYAH minyak ngalih, maka haraga barang taumpat balarang tamasuk sembaku kaya baras, minyak, gula. Palui laki bini sudah baulah janji bahwa mulai wayah ini hidup baarit supaya kawa cukup gasan hidup sabulanan.
“Sasuai anjuran sampiyan supaya mahimat ulanja maka hari ini iwak kita tapaksa babanam haja, karna minyak larang banar,” ujar bini Palui.
“Kita manyasuaiakan wan pandapatan,” sahut Palui.
“Aku katuju haja iwak babanam, basumap atawa dibuat dalam gangan,” ujarnya.
“Ulun katuju banar wan sampiyan kada biasa managih makan nang macam-macam, asal ada syukur masak napa haja katuju,” ujar bini Palui ma-ambung lakinya.
“Ini samunyaan barakat kabibisaan ading jua ma-atur duit ulanja wan rumah tangga, jadinya aku kada tasalah mamilih ikam jadi biniku,” ujar Palui.
“Kalu kaya itu jangan sariklah hari ini banyu tih sampiyan kada bagula karna gula kita habis dan wayah handak manukar tadi di kuperasi sudah habis dirabutakan urang,” ujar bini Palui.
“Kalu sual gula baik jua dibatasi karna aku samalam bapariksa ka dukter, ujar dukter bahwa aku ada gajala panyakit kancing manis makanya kurangi makan gula,” ujar Palui.
“Tapi samalam sampiyan banyak banar makan tapai, padahal tapai itu manis banar,” ujar bininya.
“Kalu makan tapai bulih haja, karna tapai itu manisnya kada matan gula tapi matan ragi,” ujar Palui baulah alasan.
“Jadi kasimpulannya kita bujur-bujur bahimat, kalu kada parlu banar jangan manukar artinya bacari akal supaya jangan kaluar duit,” ujar bininya.
“Samalam ulun kahabisan kayu padahal tagasak handak bamasak makanya tapaksa kalum sampiyan gasan ka masigit nang ulun banam jadi kayu pamasakan,” ujar bininya.
“Biniku ini pahamanan banar,” ujar Palui manyindir.
“Ayu abahnya kita makanan, nasi iwak sudah siap,” ujar bininya mambawai Palui.
Imbah tuntung makan, Palui tapaluh lalu duduk di palatar sambil bakuit gigi.
“Uiii…. umanya, umpat batakunlah?. Samalam ikam bapadah kahabisan kukuit gigi tapi tadi kulihat pina banyak haja di wadahnya,” ujar Palui.
“Itu tamasuk akalku kaya apa supaya jangan kaluar duit,” sahut bininya.
“Jadi ikam maminta wan siapa?” ujar Palui.
“Sasuai pasan sampiyan supaya mahimat maka kukuit gigi tadi ulun kumpalakan nang bahamburan di bawah lawang, mungkin bakas sampiyan, bakas ulun atawa bakas julak wan kayi,” sahut bininya.
“Jadi…… jadi kukuit gigi itu bakas tapakailah, bakas dipakai uranglah?” ujar Palui pina sarik sambil gagaluak bapicik ka parut lalu bukah ka padangan muak mangaluarakan isi parutnya mandangar panjalasan bininya.